“હું સ્ટાર છું એવું મેં ક્યારેય નથી માન્યું”
શ્રીદેવીએ બૉલીવુડની સાથે સાઉથની ફિલ્મોમાં પણ કામ કર્યું છે અને સુપરસ્ટાર હોવા છતાં તેનું કહેવું છે કે તેને ક્યારેય એક સ્ટાર હોવાનો અનુભવ નથી થયો. બૉલીવુડમાં કામ કરવા પહેલાં શ્રીદેવીએ તામિલ, તેલુગુ, મલયાલમ અને કન્નડ ફિલ્મોમાં કામ કર્યું હતું. આ વિશે વધુ જણાવતાં શ્રીદેવી કહે છે, ‘મને કોઈ દિવસ એવું નથી લાગ્યું કે હું એક સ્ટાર છું. મારા મગજમાં ક્યારેય એવી વાત પણ નથી આવી. જે દિવસે તમે એક સ્ટાર છો એવું તમારા મગજમાં બેસી જાય ત્યારે તમે કરીઅરમાં આગળ નહીં વધી શકો. મારા માટે સ્ટારડમ એક ખુશી અને પૉઝિટિવ હોવું છે. મારા માટે સ્ટારડમ ક્યારેય એવું નથી રહ્યું કે હું સ્ટાર છું એવું ફીલ કરવા લાગું. હું મારા ફૅન્સ અને પ્રોડ્યુસરોની આભારી છું, કારણ કે તેમના કારણે આજે હું હવામાં નહીં પણ જમીન પર છું. મારું માનવું છે કે જે દિવસે હું સ્ટાર છે એવું વિચારી લીધું અને મેં સફળતા મેળવી લીધી છે એવું માનવા બેસી ગઈ ત્યારે મારી કરીઅરને ફુલસ્ટૉપ લાગી જશે. તેથી હું આ વિશે વિચારતી જ નથી અને વિચારવા માગતી પણ નથી.’
ખુશી ડાન્સ-શો કરી રહી હોવાની વાતને શ્રીદેવીએ ફગાવી
શ્રીદેવીની મોટી દીકરી જાહ્નવી બૉલીવુડમાં એન્ટ્રી કરવા માટે તૈયારી કરી રહી છે ત્યારે નાની દીકરી ખુશી એક ડાન્સ-શો કરશે એ વાતને શ્રીદેવીએ ફગાવી દીધી છે. ખુશી હાલમાં એક ડાન્સ-શો માટે ઑડિશન આપી રહી હોવાની વાતો ચાલી રહી છે. આ વિશે પૂછવામાં આવતાં શ્રીદેવીએ કહ્યું હતું કે ‘ખુશી કોઈ પણ પ્રકારનો ડાન્સ ક્લાસ કે પછી ડાન્સ-શો નથી જૉઇન કરી રહી. આમાં કોઈ હકીકત નથી. અમે બધાં ખૂબ જ સરપ્રાઇઝ છીએ. આ ન્યુઝ ક્યાંથી આવ્યા એની અમને પણ ખબર નથી. અમે બધાં આ ન્યુઝ પર ખૂબ જ હસી રહ્યાં હતાં. ખુશીએ પણ મારી પાસે આવીને મને પૂછ્યું હતું કે આ ન્યુઝ ક્યાંથી આવ્યા?’
