સિરિયસ ફિલ્મ તરીકે દબંગને સલમાને ઍક્શન-કૉમેડી ફિલ્મમાં બદલાવી નાખી હતી
દબંગ
અરબાઝ ખાનને ‘દબંગ’ ફિલ્મની સ્ક્રિપ્ટ પસંદ પડી ગઈ હતી એ પછી તેણે સલમાન ખાન સાથે વાત કરી હતી. સલમાને એ ફિલ્મ કરવાની હા પાડી હતી, પણ તેણે એ ફિલ્મની સ્ક્રિપ્ટમાં ચેન્જિસ કરાવ્યાં. અમુક પંચલાઇન્સ તેણે જાતે લખી અને એ ફિલ્મમાં ગીતો પણ ઉમેરાવ્યાં. અનુરાગ કશ્યપના ભાઈ અભિનવ કશ્યપ ભાઈના પગલે અત્યંત સિરિયસ અને ડાર્ક ફિલ્મ બનાવવા માગતા હતા. તેમણે જે સ્ક્રિપ્ટ લખી હતી એ બહુ સિરિયસ હતી અને એ સ્ક્રિપ્ટ પ્રમાણે ફિલ્મમાં કોઈ સૉન્ગ નહોતાં. તેમની સ્ક્રિપ્ટ પ્રમાણે એ ફિલ્મ બની હોત તો એ બહુ જ ડાર્ક-હેવી ફિલ્મ હોત, પરંતુ સલમાન ખાને એને ઍક્શન-કૉમેડી ફિલ્મ બનાવી નાખી હતી.
એ ફિલ્મની અનેક વનલાઇનર્સ હિટ થઈ હતી એ સલમાને લખી હતી એવો ઘટસ્ફોટ અરબાઝ ખાને ‘કૉફી વિથ કરણ’ શોમાં કર્યો હતો.
ADVERTISEMENT
એ ફિલ્મની બીજી એક રસપ્રદ વાત એ છે કે એ ફિલ્મમાં ચુલબુલ પાંડેનો રોલ કરતા સલમાન ખાને જે ડાન્સ કર્યો હતો એનાં સ્ટેપ્સ કોઈ કોરિયોગ્રાફરે નહોતાં આપ્યાં, પણ સલમાન ખાન જયપુરમાં એક લગ્નમાં ગયો હતો એ વખતે તેણે ત્યાં એક ગેસ્ટને જોઈને જ હસવું આવે એ રીતે ડાન્સ કરતો જોયો હતો. એ વખતે સંગીતકાર સાજિદ-વાજિદ પણ ત્યાં હાજર હતા. એ પછી એક ૮૦ વર્ષના ગેસ્ટે બેલ્ટ સાથે ડાન્સ-સ્ટેપ્સ કર્યાં ત્યારે સલમાને તરત તેમને કહ્યું કે મારી ફિલ્મમાં હું આ ડાન્સ-સ્ટેપનો ઉપયોગ કરીશ. ત્યારે પરિચિતોમાં ભરતમામા તરીકે જાણીતા એ ગેસ્ટે મજાકમાં કહ્યું હતું કે ‘તો હું તારા પર કેસ કરીશ!’
બાય ધ વે એ ફિલ્મ અગાઉ સલમાન ખાન કોઈ ફિલ્મમાં મૂછ સાથે જોવા મળ્યો નહોતો. એને કારણે તે મૂછ સાથે અભિનય કરવામાં કમ્ફર્ટેબલ નહોતો એટલે તેણે શૂટિંગ અગાઉ જુદી-જુદી ૫૦થી વધુ પ્રકારની નકલી મૂછો લગાવીને જોયું હતું કે તેને કોઈ મૂછ શૂટ થાય છે કે નહીં. એક દિવસ તેણે અડધો ડઝન મૂછ લગાવીને ટ્રાય કરી જોઈ એ પછી તેણે એ બધી મૂછ બાજુએ મૂકી અને છેલ્લે એક મૂછ લગાવીને એ ફિલ્મની હિરોઇન સોનાક્ષી સિંહાને કહ્યું કે ‘આમાં હું તારા પિતા શત્રુઘ્ન સિંહા જેવો લાગું છું કે નહીં?’ સોનાક્ષીએ હસતાં-હસતાં કહ્યુ કે ‘હા, તમે એવા જ લાગો છો.’ અને સલમાન ખાને એ મૂછ ફાઇનલ કરી હતી. હવે તમે ‘દબંગ’ ફિલ્મ જુઓ ત્યારે સલમાનની મૂછ જોજો. તમને શત્રુઘ્ન સિંહાનાં ઘણીબધી ફિલ્મોનાં પાત્રો યાદ આવશે જેમાં તેમણે એવી મૂછ રાખી હોય!