° °

આજનું ઇ-પેપર
Thursday, 28 October, 2021


દમ મારો દમ : જાતને પૂછતા રહો કે તમારા સંતાન વિશે તમે કેટલા માહિતગાર છો

14 October, 2021 08:34 AM IST | Mumbai | Manoj Joshi

બહેતર છે કે નાનપ, શરમ અને છૂટની કોઈ આડશમાં ઊભા રહ્યા વિના સંતાનો વિશે જાણકારી રાખવાનું શરૂ કરો અને તમારા-તેમના ભવિષ્યને સિક્યૉર કરો.

પ્રતીકાત્મક તસવીર

પ્રતીકાત્મક તસવીર

આમ તો આ વાત કહેવી કે પૂછવી એ જ શરમજનક ઘટના કહેવાય, પરંતુ એક હકીકત એ પણ છે કે આજે મોટા ભાગના પેરન્ટ્સ પોતાનાં સંતાનો વિશે ઓછામાં ઓછી માહિતી ધરાવતા હોય છે. ઓછામાં ઓછી માહિતી ધરાવે છે અને ઓછામાં ઓછી પૃચ્છા કરે છે. નહીં પૂછીને તે એવું માને છે કે પછી મન મનાવે છે કે બાળકોને એટલી આઝાદી તો મળવી જ જોઈએ. વાત અહીં સ્વતંત્રતા છીનવીને તેમને પરતંત્રતા આપવાની નહીં પણ વાત છે એ સંતાન પર નજર અને જાણકારી રાખવાની. ગમે તેટલું મોટું થઈ ગયું હોય પણ બાળક એ કહેવાય તો બાળક જ અને બાળક પર નજર રાખવી એ દરેક મા-બાપની ફરજ છે.
આઝાદી અને સ્વતંત્રતાની નવી પરિભાષા બહુ ખોટી અને ખરાબ છે. પૂછવાથી કે પછી ઇન્ક્વાયરી કરવાથી સંતાનોને જો એવું લાગે કે તેમની આઝાદી છીનવાઈ રહી છે તો તમારે ચેતવું પડશે. તમારે સમજવું પડશે કે તમારાં બાળકો ખોટી સ્કૂલમાં ભણીને આવી ગયાં છે અને જો સ્કૂલ સાચી હતી તો તમે તેમને સંસ્કારની સાચી પરિભાષા સમજાવી નથી. પૃચ્છા કોઈ હિસાબે ખોટી કે ખરાબ ન હોઈ શકે અને તપાસ ક્યારેય ગેરવાજબી કે અનૈતિક ન હોઈ શકે. આજે મોટા ભાગનાં સંતાનોને કંઈ પૂછવામાં આવે તો તેમને માઠું લાગી જાય છે. એવું લાગે છે કે મા-બાપ તેમને હજી પણ ઘોડિયાઘરની જેમ ટ્રીટ કરે છે; પણ તેમણે સમજવું જોઈશે કે એ પરીક્ષા તેમણે આજે જ નહીં, જિંદગીભર પાસ કરવાની રહેશે અને એ પાસ કરતાં રહેશે ત્યાં સુધી તેમના પરનો વિશ્વાસ અકબંધ રહેશે.
નવી જનરેશન અને જૂની જનરેશને એકમેક પર વિશ્વાસ રાખવાનો છે અને એ વિશ્વાસ રાખવા માટે એકબીજા પરની શ્રદ્ધા સતત જીતતા રહેવાની છે. જો ક્યાંય પણ સંતાન વિશે તમને કશી ખબર ન હોય તો આજે જ, અત્યારે જ પહેલું કામ એ કરજો કે તેને પાસે બેસાડજો અને બધું પૂછજો. જૉબ કરતા સંતાનની સૅલેરી શું છે એની પણ તમને ખબર હોવી જોઈએ અને કૉલેજ જતાં સંતાનોના ફ્રેન્ડ્સ કોણ છે એના વિશે પણ તમને ખબર હોવી જોઈએ. તમારે સમજવું પડશે, જાણવું અને જોવું પડશે કે એ કોની સોબતમાં છે અને એ પણ જોવું પડશે કે એ સોબતની તેના પર કેવી અસર થઈ રહી છે. ઘણા મિત્રો કહે છે કે આર્યન ખાનવાળી ઘટનાને મીડિયા વધુપડતું ખેંચી રહ્યું છે, પણ હું કહીશ કે બહુ સારું છે કે એ ખેંચાઈ રહ્યું છે. આ ઘટના પરથી અનુભવ લેવાનો છે અને આ ઘટના પરથી સૌકોઈએ સમજવાનું છે કે જે કંઈ ચાલી રહ્યું છે એ દિશામાં આપણાં સંતાનો તો નથીને. કબૂલ કે તમે એવું વિચારતા રહો કે આપણાં બાળકો એવાં ન હોય; પણ યાદ રાખજો, કૉન્ફિડન્સ અને ઓવર-કૉન્ફિડન્સ વચ્ચે બહુ પાતળી ભેદરેખા હોય છે અને એ પાતળી ભેદરેખા જ તમને અને તમારાં સંતાનોને જોખમમાં મૂકી શકે છે. બહેતર છે કે નાનપ, શરમ અને છૂટની કોઈ આડશમાં ઊભા રહ્યા વિના સંતાનો વિશે જાણકારી રાખવાનું શરૂ કરો અને તમારા-તેમના ભવિષ્યને સિક્યૉર કરો.

14 October, 2021 08:34 AM IST | Mumbai | Manoj Joshi

અન્ય લેખો

‘મી ટાઇમ’ માટે ‘મી વેકેશન’

ફિટનેસ માટે ઝુમ્બા ડાન્સ જૉઇન કરતાં મળેલા આત્મવિશ્વાસે ટ્રેકિંગનો એવો શોખ જન્માવ્યો કે મુલુંડમાં રહેતાં ૪૧ વર્ષનાં ફાલ્ગુની છેડાએ કપરા કહેવાય એવા લેહના કંગ યસ્તે ટૂ અને એવરેસ્ટ બેઝ કૅમ્પ સુધીની સફર ખેડી નાખી

28 October, 2021 07:18 IST | Mumbai | Bhavini Lodaya

જાણો, માણો ને મોજ કરો

ત્રિષ્ના પટનાઇક દ્વારા કન્ડક્ટ થનારી વર્કશૉપમાં તમે નવી આઇટમો પણ બનાવી શકો છો અને જૂની વેસ્ટ ચીજોને અપસાઇકલ કરીને એને ઇકો-ફ્રેન્ડ્લી પણ બનાવી શકો છો. ટિન, લેધર, ગ્લાસ અને ફર્નિચર પર પણ આ આર્ટ ટ્રાય કરી શકાય છે. 

28 October, 2021 07:10 IST | Mumbai | Gujarati Mid-day Correspondent

દિવાળી અને મોટી ફિલ્મો

આ બન્ને એકમેકના પર્યાય હતા અને એ દિશા હવે ધીમે-ધીમે ખૂલવાની છે, પણ એ તો જ ખૂલશે જો આપણે ચીવટ રાખીશું. સૌકોઈને એક રિક્વેસ્ટ, જો ક્યાંય સહેજ પણ સિમ્પ્ટમ્સ દેખાતા હોય તો પ્લીઝ ઘરે રહેજો

28 October, 2021 01:50 IST | Mumbai | JD Majethia

This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK