આજના સમયમાં જ્યારે દીકરીઓ કામ કરતી થઈ છે તો એની પાછળ જેમ માની અતૃપ્ત ઇચ્છાઓ કારણભૂત છે એવી જ રીતે વિદેશનો મોહ લઈને ભાગતા યંગસ્ટર્સમાં ક્યાંક ને ક્યાંક માબાપની મનમાં ધરબાયેલી ઇચ્છા વધારે કારણભૂત છે એ પણ એટલું જ સાચું છે.
મેરે દિલ મેં આજ ક્યા હૈ?
પ્રતીકાત્મક તસવીર (સૌજન્ય આઇસ્ટૉક)
હા, અમુક અંશે એવું પણ છે. આજના સમયમાં જ્યારે દીકરીઓ કામ કરતી થઈ છે તો એની પાછળ જેમ માની અતૃપ્ત ઇચ્છાઓ કારણભૂત છે એવી જ રીતે વિદેશનો મોહ લઈને ભાગતા યંગસ્ટર્સમાં ક્યાંક ને ક્યાંક માબાપની મનમાં ધરબાયેલી ઇચ્છા વધારે કારણભૂત છે એ પણ એટલું જ સાચું છે.
એક સમયે જે મા કે પછી બાપને (ખાસ તો પપ્પાને) ફૉરેન જઈને સેટલ થવાની ઇચ્છા હતી, પણ કોઈ કારણસર તેઓ ત્યાં જઈ નથી શક્યા એ પપ્પાઓની એ અતૃપ્ત ઇચ્છાઓ યંગસ્ટર્સના મનમાં નાનપણથી આવતી હોય છે અને એના જોરે તે આ સપનું એટલું મોટું કરી નાખે છે કે સાચું-ખોટું કે સારા-ખરાબની વાત પણ તે વીસરી જાય છે. વીસરાતી એ ભાવનાને કારણે જ દુઃસાહસની દુનિયા ખૂલે છે. તમે જો ઉત્તર ગુજરાત જાઓ તો એક વખત ત્યાં ફૉરેન પહોંચાડવાના ભાવ જાણશો તો ખબર પડશે કે કેવી તોતિંગ રકમ આ લોકો પાસેથી કઢાવવામાં આવે છે. હમણાં અમેરિકામાંથી પકડાયેલા ચારેચાર મહેસાણાના યુવક પાસેથી વ્યક્તિગત રીતે પચીસ લાખ રૂપિયાથી વધારેની રકમ કઢાવી છે. એ જે રકમ છે એ રકમમાં ક્યાંય ઑફિશ્યલ પેપર્સ નથી થતા. જરા તપાસ કરો ભાઈ, તમારી આ રકમમાં નાના દેશો તમને ઑફિશ્યલ આવકારવા તૈયાર છે; પણ ના, એવું કોઈને કરવું નથી. અમેરિકા. બસ, અમેરિકા.
ADVERTISEMENT
અમેરિકાના આ મોહ પાછળ ગામમાંથી ત્યાં સેટલ થયેલા વડીલો પણ એટલા જ જવાબદાર છે એવું કહેવું પણ ખોટું નહીં કહેવાય. આ વડીલો જ્યારે પણ દેશમાં આવે છે ત્યારે તેમનો જે ઠાઠ હોય છે એ ઠાઠ આ બધા યંગસ્ટર્સને ફૉરેન તરફ ખેંચવાનું કામ કરે છે. ગામમાં તેઓ જે પ્રકારનાં ઘરો બનાવે છે એ ઘરો આ યંગસ્ટર્સને ફૉરેન તરફ તાણી જવાનું કામ કરે છે. પેલી ગુજરાતી ઉક્તિ છેને, ગધેડાને ગાજર દેખાડો તો એ દોડે, એની જેમ જ. હા, ડિટ્ટો એવી જ રીતે આપણા યંગસ્ટર્સ માટે પેલા વડીલોની જે શોહરત છે એ શોહરત ગાજર બનીને આપણાં બાળકોને દોડતાં કરી દે છે, પણ એ ગાજરને ઉગાડવામાં કેટલા વીસે સો થાય છે એની તેમને ખબર નથી.
દેશમાં આવતા વડીલોએ આ તમામ વાતો પણ આ યંગસ્ટર્સને કરવી જોઈએ અને એ વાતોમાં રહેલા સંઘર્ષની જ નહીં, પણ નીતિવિષયક વાતો પણ તેમને સમજાવવી જોઈએ. જો એ સમજાવી નહીં શકો તો આ પ્રકારનું વાતાવરણ અકબંધ રહેશે અને આવું વાતાવરણ અકબંધ રહેશે ત્યાં સુધી આ યુવાનો ન તો આપણને કામ આવે, ન તો ઘર કે પરિવારને કામ આવે કે ન તો રાષ્ટ્રના હિતમાં કામ કરે. અફકોર્સ, તે અહિત નહીં કરે, પણ તેના હાથે કશું કૉન્ક્રીટ પણ થશે નહીં અને એ થશે નહીં એટલે તેમનું ફ્રસ્ટ્રેશન પણ વધશે.
ફૉરેન જવું ખરાબ નથી, પણ દેશને ફૉરેન જેવો બનાવવો એનાથી રૂડું બીજું કોઈ કામ નથી એ પણ મનમાં રહેવું જોઈએ. ડૉલર કંઈ એમ રેઢા નથી પડ્યા કે તમે જઈને ઊભા રહો એટલે તમારા પર વરસવા માંડે. ના ભાઈ ના. ડૉલર કમાવા, પાઉન્ડ કમાવા એ તો તમારા રૂપિયા કરતાં પણ અઘરા છે જે વાસ્તવિકતાને સમજવાની તાતી જરૂર છે.