HDFC ના આદિત્ય પુરી 89 લાખના પગાર સાથે સૌથી વધુ કમાતા બેન્કના CEO
આદિત્ય પુરી, સીઈઓ, એસડીએફસી બેન્ક
Mumbai : HDFC બેન્કના એમડી આદિત્ય પુરીએ 2018-'19માં ₹89 લાખના માસિક બેઝિક પગારસાથે સૌથી વધુ વેતન મેળવતા બેન્ક CEOનું સ્થાન જાળવ્યું છે. પુરીએ 25 વર્ષ પહેલાં HDFC બેન્કની શરૂઆતથી જ સુકાન સંભાળ્યું છે. જાન્યુઆરીમાં એક્સિસ બેન્કના CEOનો હોદ્દો સંભાળનારા અમિતાભ ચૌધરી ₹30 લાખના માસિક બેઝિક પગાર સાથે બીજા ક્રમે છે. જ્યારે કોટક મહિન્દ્રા બેન્કના CEO ₹27 લાખ સાથે માસિક બેઝિક પગારના લિસ્ટમાં ત્રીજા સ્થાને છે.
ચંદા કોચર ICICI બેન્કના જ્યારે CEO હતા ત્યારે 26 લાખનો મહિને પગાર હતો
બેન્કોના વાર્ષિક અહેવાલ પરથી તૈયાર કરાયેલી યાદી અનુસાર ICICI બેન્કના ભૂતપૂર્વ CEO ચંદા કોચર એક્ઝિટ પહેલાં મહિને ₹26 લાખનો પગાર મેળવતા હતા અને લિસ્ટમાં તે ચોથા ક્રમે છે. તેમના અનુગામી સંદીપ બક્ષીએ સરેરાશ માસિક ₹22 લાખના પગાર સાથે સૌથી વધુ વેતન મેળવતા CEOની યાદીમાં પાંચમો ક્રમ મેળવ્યો છે. બક્ષી ઓક્ટોબરમાં CEO બન્યા હતા. ઇન્ડસઇન્ડ બેન્કના રોમેશ સોબતી સરેરાશ માસિક ₹16 લાખના પગાર સાથે CEOના લિસ્ટમાં છઠ્ઠા સ્થાને છે.
બેડ લોન અને નફાકારકતાના કારણે બેન્કના CEO ના પગાર ચર્ચાનું કેન્દ્ર બન્યા
બેન્કોની નફાકારકતા અને બેડ લોનને કારણે CEOના પગાર ચર્ચામાં આવ્યા છે. કેટલાક કેસમાં RBIને CEOના બોનસની મંજૂરી અટકાવી દેવી પડી હતી. ભૂતપૂર્વ ગવર્નર ઊર્જિત પટેલની આગેવાનીમાં RBIએ બેન્કોના ટોચના એક્ઝિક્યુટિવ્સના પગાર અને ભથ્થાં અંગે કડક વલણ અપનાવ્યું હતું.
યસ બેન્કના CEO રવનીતના પગારની ગણતરી કરાઈ નથી
યસ બેન્કના CEO રવનીત ગિલ અને ભૂતપૂર્વ CEO રાણા કપૂરના પગારની ગણતરી કરવામાં આવી નથી. કારણે બેન્ક ભથ્થાં, PFમાં યોગદાન અને મેડિકલ રિઇમ્બર્સમેન્ટ સહિતની રકમનો કુલ આંકડો વાર્ષિક અહેવાલમાં પગાર તરીકે દર્શાવે છે. માર્ચ મહિનામાં ગિલનો પગાર ₹59 લાખ દર્શાવાયો છે, જે CEO તરીકે તેમનો પહેલો મહિનો હતો. કપૂરનો કુલ પગાર જાન્યુઆરીમાં પૂરા થયેલા 10 મહિનામાં ₹6.48 કરોડ હતો. 31 ડિસેમ્બર, 2018ના રોજ એક્સિસ બેન્કના CEOનો હોદ્દો છોડનારા શિખા શર્માને મહિને સરેરાશ ₹24 લાખ મળતા હતા.
આ પણ જુઓ : જ્યારે એકસાથે જોવા મળ્યો આખો અંબાણી પરિવાર, જુઓ તસવીરો
ગ્લોબલ એક્ઝિક્યુટિવ સર્ચ ફર્મ EMA પાર્ટનર્સના રિજનલ એમડી (એશિયા) કે સુદર્શને જણાવ્યું હતું કે, "CEOના પગારનો આધારે શેરધારકો માટે કરેલી મૂલ્યવૃદ્ધિ અને મહત્ત્વના માપદંડમાં સુધારા પર રહે છે. બેઝિક પગાર ઉપરાંત, CEOના પેકેજમાં બોનસ અને સ્ટોક ઓપ્શન્સનો પણ સમાવેશ થાય છે. એટલે એવું કહી શકાય કે, બેન્કનું કદ પગારની રકમ નક્કી કરતું નથી, પણ તેનો આધાર શેરધારકોની મૂલ્યવૃદ્ધિ તેમજ મૂડી પરના વળતર (RoCE), નેટ ઇન્ટરેસ્ટ માર્જિન (NIM) સહિતનાં મહત્ત્વનાં માપદંડમાં સુધારા પર રહે છે."
CEOના પગારનું સંકલન વાર્ષિક અહેવાલના આધારે કરાયું છે, પણ નાણાકીય પેકેજની તુલના થઈ શકે તેમ નથી. કારણ કે બે CEOs બક્ષી અને ચૌધરીએ ચાલુ વર્ષે જુદાજુદા સમયે કાર્યભાર સંભાળ્યો છે. બક્ષી જૂનમાં COO હતા અને ઓક્ટોબરમાં CEO બન્યા. જ્યારે ચૌધરીએ જાન્યુઆરીમાં CEOનું પદ સંભાળ્યું હતું. પગારની ગણતરી કરતી વખતે ETએ ભથ્થાં અને અન્ય સુવિધાની ગણતરી કરી નથી. કારણ કે જુદીજુદી બેન્કોમાં તેની ફાળવણી અલગઅલગ રીતે થાય છે.
