જૂન મહિનામાં તુવેરની ૭૦થી ૭૫ હજાર ટનની આયાતનો અંદાજ
તુવેરદાળ
દેશમાં લૉકડાઉનની અસરે તુવેરદાળની માગમાં મોટો ઘટાડો થયો હોવાથી ભાવમાં પણ નરમાઈ જોવા મળી રહી છે. કેન્દ્ર સરકારે હજી તુવેરની આયાતનો ક્વોટા ફાળવવાનો બાકી હોવાથી અને પાક પણ ઓછો હોવા છતાં ભાવ ઘટી રહ્યા છે.
દેશમાં કોરોનાને કારણે હાલમાં મોટા ભાગની મંડી બંધ છે અને પ્રોસેસિંગ મિલો પણ બંધ હોવાથી હાલના તબક્કે વેપાર મંદ પડ્યા છે. મુંબઈમાં લેમન તુવેરના ભાવ ક્વિન્ટલે ૫૦૦ રૂપિયા ઘટીને ૬૫૦૦ રૂપિયાની સપાટી પર પહોંચ્યાં છે, જ્યારે અરુષા ક્વૉલિટીની તુવેરમાં ભાવ ઘટીને ૬૧૫૦થી ૬૨૦૦ રૂપિયા ચાલી રહ્યા છે.
ADVERTISEMENT
બજારનાં સૂત્રો કહે છે કે કોરોનાને કારણે માગ ન હોવાથી ભાવ ઘટ્યા છે, પરંતુ જો કોરોનાની સ્થિતિ હળવી થશે. ત્યાર બાદ બજાર સુધરી શકે છે. હાલમાં આયાતી માલનું પ્રેશર આવે એવી પણ સંભાવના છે. જૂન મહિનામાં દેશમાં સુદાનથી ૩૦થી ૪૦ હજાર ટન અને આફ્રિકાથી જૂની તુવેર ૨૦થી ૨૫ હજાર ટન આવે એવી સંભાવના છે. કેન્દ્ર સરકારે કુલ ચાર લાખ ટન આયાત ક્વોટા ફાળવ્યો છે, જ્યારે બે લાખ ટન સરકાર આયાત કરશે. આ આયાત ક્વોટાની જેમ-જેમ ફાળવણી થશે એમ આયાતી માલ આવશે.
બર્મામાં હાલમાં ૨.૫૦ લાખ ટન તુવેરનો સ્ટૉક પડ્યો છે, જેમાંથી ૫૦ હજાર ટન જૂનો અને બે લાખ ટન નવી તુવેર છે.
