સીસીઆઇએ દોઢ મહિનામાં ૨૫૦૦ રૂપિયા ભાવવધારો કર્યો
પ્રતીકાત્મક તસવીર
દેશમાં રૂના ભાવ આસમાને પહોંચી ગયા છે ત્યારે સરકારી એજન્સી કૉટન કૉર્પોરેશન ઑફ ઇન્ડિયા (સીસીઆઇ) પાસે પણ રૂનો સ્ટૉક હવે તળિયે પહોંચી ગયો છે. સરકારી એજન્સીએ સત્તાવાર રીતે જણાવ્યું હતું કે એજન્સી પાસે ઑક્ટોબર મહિનાથી નવી સીઝન શરૂ થાય એ પહેલાં હાલ માત્ર નવ લાખ ગાસંડીનો જ રૂનો સ્ટૉક પડ્યો છે. રૂની જબરદસ્ત માગને કારણે મોટો સ્ટૉક હોવા છતાં હવે તળિયું દેખાયું છે.
સીસીઆઇના ચૅરમૅન અને મૅનેજિંગ ડિરેક્ટર પ્રદીપકુમાર અગ્રવાલે જણાવ્યું હતું કે સીસીઆઇ પાસે ચાલુ સીઝનની શરૂઆતમાં ૧૧૫ લાખ ગાંસડીનો ખૂલતો સ્ટૉક હતો અને ચાલુ સીઝનમાં કુલ ૯૨ લાખ ગાંસડીની ખરીદી કરી હતી, પરંતુ માગ મોટી રહેવાને કારણે સ્ટૉક હવે ઓછો છે.
ADVERTISEMENT
તેમણે વધુમાં કહ્યુ કે વૈશ્વિક રૂના ભાવ અને એમસીએક્સમાં કૉટનના ભાવમાં છેલ્લા દોઢેક મહિનામાં ખાંડીએ અનુક્રમે ૭૫૦૦ રૂપિયા અને ૬૦૦૦ રૂપિયાનો વધારો થયો હોવા છતાં સીસીઆઇએ આ સમયગાળામાં અમુક વરાઇટીને બાદ કરતાં મોટા ભાગમાં ખાંડીએ ૨૨૦૦થી ૨૫૦૦ રૂપિયાનો વધારો કર્યો છે.
સીસીઆઇ પાસે પડેલા સ્ટૉકમાંથી ૪૦ ટકા જેટલું રૂ માત્ર છેલ્લા એક જ મહિનામાં દેશની ટેક્સટાઇલ્સ મિલોએ ખરીદી કર્યું છે. સીસીઆઇ દ્વારા બંગલા દેશ સાથે પણ નિકાસ કરવાના કરારો થયા હતા, પરંતુ એ હવે નવી સીઝનમાં જ રેગ્યુલર નિકાસની સંભાવના છે.