જૂન ક્વૉર્ટરના અંતે એક્સચેન્જની આવક ૧૯ ટકા વધી
પ્રતીકાત્મક તસવીર
બીએસઈમાં નોંધાયેલા રોકાણકારોની સંખ્યા માત્ર બે વર્ષમાં બમણી વધીને હવે ૧૧ કરોડને વટાવી ગઈ છે અને હજી એમાં વધારો થઈ રહ્યો છે. બીએસઈનાં વિવિધ પ્લૅટફૉર્મ્સ ભારતીય કંપનીઓ માટે પસંદગીનાં પ્લૅટફૉર્મ્સ રહ્યાં છે. નાણાકીય વર્ષ ૨૦૨૩ના પ્રથમ ત્રિમાસિક ગાળામાં બીએસઈના પ્લૅટફૉર્મ મારફત દેશની કંપનીઓએ ઇક્વિટી બૉન્ડ્સ, કમર્શિયલ પેપર્સ, મ્યુનિસિપલ બૉન્ડ્સ ઇન્વઆઇટીઝ વગેરે મારફતે ૩.૧ લાખ કરોડ રૂપિયા એકત્ર કર્યા છે, એમ બીએસઈએ અખબારી યાદીમાં જણાવાયું છે.
બીએસઈ લિમિટેડના ૩૦ જૂન, ૨૦૨૨ના રોજ પૂરા થયેલા ત્રિમાસિક ગાળાના અંતે કન્સોલિડેટેડ વહેંચણીપાત્ર ચોખ્ખો નફો આગલા વર્ષના સમાન ગાળાના ૫૩.૪ કરોડ રૂપિયાથી ૧૮ ટકા ઘટીને ૪૪ કરોડ રૂપિયા થયો છે. કાર્યકારી નફાનું માર્જિન જોકે ૨૬ ટકાથી વધીને ૨૭ ટકા થયું છે. કામકાજની આવક ૧૫૭ કરોડ રૂપિયાથી ૧૯ ટકા વધીને ૧૮૬.૯૦ કરોડ રૂપિયા થઈ છે.
ઉક્ત ત્રિમાસિક ગાળામાં બીએસઈ એસએમઈ એક્સચેન્જ પર ૧૦ કંપની લિસ્ટ થઈ હતી, એ સાથે લિસ્ટેડ કંપનીઓની કુલ સંખ્યા જૂન અંતે વધીને ૩૭૭ થઈ હતી. સ્ટાર્ટ-અપ્સની સંખ્યા ૧૪ થઈ છે. એસએમઈ ક્ષેત્રે બીએસઈનો બજારહિસ્સો ૬૦ ટકારહ્યો છે.