BMCના ક્લીન-અપ માર્શલનો ભાંડો ફોડ્યો ગુજરાતી ડૉક્ટરે

ઘાટકોપરમાં રેલવે-સ્ટેશન પાસે યુનિફૉર્મ અને આઇડેન્ટિટી કાર્ડ વગર તેમ જ રસીદ આપ્યા વગર લોકો પાસેથી ફાઇન વસૂલ કરે છે ક્લીન-અપ માર્શલ: રેલવેની હદમાં દંડાત્મક કાર્યવાહી કરી રહેલા આ માર્શલો સામે રેલવે-પોલીસમાં ફરિયાદ : રેલવે-પોલીસે વગર ટિકિટે રેલવેની પ્રિમાઇસિસમાં પ્રવેશ કરવા અને પબ્લિકને હેરાન કરવા માટે તેમની સામે ગુનો નોંધ્યો

BMC

રોહિત પરીખ

ઘાટકોપર (ઈસ્ટ)માં રેલવે રિઝર્વેશન ઑફિસ પાસે યુનિફૉર્મ અને આઇડેન્ટિટી કાર્ડ વગર તેમ જ દંડની રકમની વસૂલાત બાદ રસીદ આપ્યા વગર લોકોને લૂંટતા BMCના ક્લીન-અપ માર્શલનો એક ગુજરાતી ડૉક્ટરે ભાંડો ફોડ્યો છે. ડૉક્ટરની મધ્યસ્થીને કારણે રોડ પર થૂંકનારી એક વ્યક્તિ પાસેથી રસીદ વગર દંડના વસૂલ કરાયેલા ૭૦૦ રૂપિયા માર્શલે પાછા આપ્યા હતા. આ બનાવ શનિવારે સાંજે સવાપાંચ વાગ્યે બન્યો હતો. આખો ડ્રામા લગભગ ચાલીસ મિનિટ ચાલ્યો હતો. 

રેલવેની હદમાં લોકો વિરુદ્ધ દંડાત્મક કાર્યવાહી કરી રહેલા આ માર્શલો સામે ગઈ કાલે ઘાટકોપરમાં ડૉક્ટર અને અન્ય સામાજિક કાર્યકરો દ્વારા રેલવે-પોલીસમાં ફરિયાદ નોંધાવવામાં આવી હતી. રેલવે-પોલીસે શનિવારના બનાવ માટે શિવાજીનગરની લોટસ કૉલોનીમાં રહેતા ૩૧ વર્ષના મહમ્મદઅલી મહમ્મદમિયાં કુરેશીની સામે રેલવેની હદમાં વગર ટિકિટે દાખલ થવાનો ગુનો નોંધ્યો હતો.

ઘાટકોપરના ડૉ. કેયૂર દોશી તેમની નાની દીકરી સાથે બહારગામની ટિકિટ કૅન્સલ કરાવવા રિઝર્વેશન સેન્ટર પર શનિવારે સાંજે સવાપાંચ વાગ્યે ગયા હતા. ત્યાં તેમણે જોયું કે એક વ્યક્તિ બીજી વ્યક્તિ પાસેથી થૂંકવા માટે દંડ વસૂલ કરી રહી હતી. થૂંકનારી વ્યક્તિ સાધારણ હતી. BMCના ક્લીન-અપ માર્શલ તરીકે ઓળખાવતી વ્યક્તિએ તેને ૭૦૦ રૂપિયા દંડ કર્યો હતો. એની સામે જે વ્યક્તિ પોતાને ક્લીન-અપ માર્શલ કહી રહી હતી તેણે દંડની રકમની રસીદ આપી નહોતી. આ દૃશ્ય જોઈ રહેલા ડૉક્ટરે રસીદ ન આપવાના મુદ્દે ક્લીન-અપ માર્શલને ચૅલેન્જ કરી હતી. એને પરિણામે ક્લીન-અપ માર્શલે થૂંકનારી વ્યક્તિને દંડપેટે વસૂલ કરેલા ૭૦૦ રૂપિયા પાછા આપ્યા હતા.

આ બાબતની માહિતી આપતાં ડૉ. કેયૂર દોશીએ ‘મિડ-ડે’ને કહ્યું હતું કે ‘ક્લીન-અપ માર્શલનો આખો ડ્રામા હું જોઈ રહ્યો હતો. તેણે થૂંકનારી વ્યક્તિને દંડની રકમ સામે રસીદ આપી નહોતી. આથી તરત જ મેં ક્લીન-અપ માર્શલને ચૅલેન્જ કરી હતી. એના જવાબમાં ક્લીન-અપ માર્શલે તેની પાસે રસીદ પૂરી થઈ ગઈ હોવાનું કહ્યું હતું.’

આ પહેલાં ક્લીન-અપ માર્શલે થૂંકનારી વ્યક્તિને કહ્યું હતું કે આમ તો રોડ પર થૂંકવા માટેનો દંડ ૫૫૦૦ રૂપિયા છે, પરંતુ તારી પાસે પૈસા નથી તો તું ફક્ત ૭૦૦ રૂપિયા દંડ ભરી દે એમ જણાવતાં ડૉ. કેયૂર દોશીએ કહ્યું હતું કે ‘આખા મામલાનો વિડિયો ઉતારીને હું પેલા ક્લીન-અપ માર્શલની પાછળ-પાછળ ગયો હતો. આ સમયે તેણે મોબાઇલ પર ફોન જોડીને વાત શરૂ કરી હતી કે યાર, રસીદબુક ખતમ હો ગઈ હૈ, જલ્દી સે ભેજો. એમ કહીને તે ચાલવા લાગ્યો હતો. જોકે મેં તેનો પીછો છોડ્યો નહોતો. તેની સાથે એક મહિલા સહિત બીજા ચાર-પાંચ જણ પણ હતા. તેમણે પણ યુનિફૉર્મ પહેર્યો નહોતો. તેમની પાસે પણ કોઈ પ્રકારનું આઇડેન્ટિટી કાર્ડ નહોતું. આથી હું પેલા ક્લીન-અપ માર્શલને અને થૂંકનારી વ્યક્તિને લઈને નજીકની રેલવે-પોલીસ ઑફિસમાં ગયો હતો. જોકે રેલવે-પોલીસે આ મામલો તેમની હદ આવતો નથી એમ કહીને હાથ ખંખેરી નાખ્યા હતા. ત્યાં સુધીમાં ઘણીબધી પબ્લિક જમા થઈ ગઈ હતી તેમ જ તેનો કહેવાતો સિનિયર માર્શલ પણ આવી ગયો હતો. તેની સામે પહેલાં ક્લીન-અપ માર્શલે થૂંકનારી વ્યક્તિને તેની પાસેથી લીધેલા ૭૦૦ રૂપિયા પાછા આપી દીધા હતા.’

રેલવેની હદમાં બનાવ બન્યો હોવા છતાં ડૉ. કેયૂર દોશીની ફરિયાદ ન લેવા માટે ‘મિડ-ડે’એ ઘાટકોપર રેલવે-પોલીસના સિનિયર સાથે ગઈ કાલે સવારે વાત કરી હતી તેમ જ તેમને ડૉક્ટરની ફરિયાદ લેવા અને રેલવેની હદમાં આવા બનાવ ન બને એના પર ધ્યાન આપવા કહ્યું હતું. જોકે રેલવેના સિનિયર પોલીસ-અધિકારીએ પહેલાં તો આખો મામલો તેમની હદમાં બન્યો નહોતો એમ કહ્યું હતું. ત્યાર બાદ ગઈ કાલે સેન્ટ્રલ રેલવેની ઝોનલ રેલવે યુઝર્સ કમિટી તથા ડિવિઝનલ રેલવે યુઝર્સ કમિટીના સભ્ય જિતેષ માટલિયા, ફેડરેશન ઑફ અસોસિએશન્સ ઑફ મહારાષ્ટ્રના જનરલ સેક્રેટરી આશિષ મહેતા અને ઘાટકોપરના અન્ય સામાજિક કાર્યકરોની હાજરીમાં ડૉ. કેયૂર દોશીની ફરિયાદ નોંધી હતી.’

નવાઈની વાત તો એ છે કે આ અગાઉ અનેક વાર ઘાટકોપર રેલવે-સ્ટેશન પર આવા બનાવો બન્યા છે. આ બાબતમાં જ્યારે પણ ક્લીન-અપ માર્શલના નામે ચાલી રહેલી લૂંટ માટે BMCના કમિશનર અજોય મેહતાને ‘મિડ-ડે’એ ફરિયાદ કરી છે ત્યારે તેમણે આ મુદ્દે મૌન સેવ્યું છે. શનિવારના બનાવ સંબંધમાં પણ અજોય મેહતાએ ‘મિડ-ડે’એ કરેલા વૉટ્સઍપનો કોઈ જ જવાબ આપ્યો નહોતો.

ઘાટકોપર (ઈસ્ટ)ના એક યુવાન સામાજિક કાર્યકર જેણે આ પહેલાં પણ અનેક વાર ક્લીન-અપ માર્શલના નામે દંડ વસૂલ કરતા લોકોની ફરિયાદ કરી છે તેણે ‘મિડ-ડે’ને કહ્યું હતું કે ‘આ પહેલાં પણ રસીદ વગર દંડ વસૂલ કરતા ક્લીન-અપ માર્શલના અહેવાલો ‘મિડ-ડે’માં પ્રસિદ્ધ થયા છે. ત્યાર બાદ અચાનક આ વિસ્તારમાંથી આ માર્શલો ખોવાઈ જતા હતા. અત્યારે જે લોકોના ફોટો ડૉ. કેયૂર દોશીએ સોશ્યલ મીડિયામાં પ્રસિદ્ધ કર્યા છે એ બધા જ રાતના સમયે રેલવે-પોલીસની ઑફિસની સામે ઊભેલા અનેક વાર જોવા મYયા છે. ગ્પ્ઘ્એ અને પોલીસે આ બાબતમાં કડક કાર્યવાહી કરવી જરૂરી છે.’

આ બનાવ અમારી હદમાં બન્યો નહોતો એવી માહિતી આપતાં ગઈ કાલે રેલવે પોલીસ-અધિકારી બ્રજેશ શર્માએ ‘મિડ-ડે’ને કહ્યું હતું કે ‘ગઈ કાલે અમે BMCના ક્લીન-અપ માર્શલ તરીકે ઓળખાવતા શિવાજીનગરના ૩૧ વર્ષના મહમ્મદઅલી મહમ્મદમિયાં કુરેશીની સામે રેલવેની હદમાં વગર ટિકિટે દાખલ થવાનો ગુનો નોંધ્યો હતો. ડૉકટર અને જિતેષ માટલિયાની ફરિયાદ પછી કુરેશીએ અમને કહ્યું હતું કે મેં થૂંકનારી વ્યક્તિ પાસે રેલવેની હદની બહાર નીલયોગ મૉલ પાસે દંડ વસૂલ કર્યો હતો, પરંતુ આખો મામલો વિડિયોમાં લેવાતો હોવાથી અમે વાતચીત કરતાં-કરતાં રેલવે રિઝર્વેશન સેન્ટર પાસે ગયા હતા.’

Comments (0)Add Comment

Write comment
quote
bold
italicize
underline
strike
url
image
quote
quote
smile
wink
laugh
grin
angry
sad
shocked
cool
tongue
kiss
cry
smaller | bigger

security code
Write the displayed characters


busy
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK