વેચાયા વિનાના ફ્લૅટ પર ટૅક્સ નાખવાથી ફ્લૅટના ભાવ ઓછા થશે?

સરકાર આમ માનતી હોય તો એ ખોટું છે, કારણ કે એનાથી ફ્લૅટ સસ્તા નહીં પણ હજી વધુ મોંઘા થશે એવું બિલ્ડરો કહે છે
પલ્લવી આચાર્ય

રિયલ એસ્ટેટ સેક્ટરમાં થોડા દિવસ પહેલાં એક સમાચાર વહેતા થયેલા કે કરવેરા વિભાગ બિલ્ડરોના અત્યાર સુધી વેચાયા વિના પડી રહેલા ફ્લૅટ્સ પર ટૅક્સ નાખવાની વેતરણમાં છે. સરકાર આ ટૅક્સ નાખશે તો બિલ્ડરો-ડેવલપરોએ વેચાયા વિના પડેલા ફ્લૅટ્સ વેચવાની ઉતાવળ કરવી પડશે અને એ માટે તેઓ થોડુંઘણું સમાધાન કરીને પણ ફ્લૅટ વેચી દેવા મજબૂર થશે એથી ફ્લૅટના ભાવ થોડા નીચે ઊતરશે એવું સરકાર માની રહી હોય અને ફ્લૅટના ભાવ ઉતારવા માટે સરકાર બિલ્ડરોનું નાક દબાવવા માગતી હોય તો આ બાબતમાં તો એ ખાંડ ફાકશે એવું બિલ્ડરોની વાતો પરથી લાગે છે. જોઈએ બિલ્ડર-લૉબી આ વિશે શું કહે છે?

ફ્લૅટના ભાવ ઘટશે નહીં વધશે : જેઠાલાલ દેઢિયા, રાજશ્રી બિલ્ડર્સ


લોકો ફ્લૅટ ખરીદવા તૈયાર હોય તો બિલ્ડરો તો આજે પણ ફ્લૅટ વેચવા રેડી છે. તેઓ પોતાનો માલ પકડીને બેઠા છે એવું નથી, પણ આજે જે ભાવ છે એનાથી સસ્તું વેચવું તેમને પરવડે એમ જ નથી. કૉસ્ટિંગથી ઓછા ભાવે, નુકસાની કરીને તો કોઈ ફ્લૅટ ન જ વેચી શકે. એમાં રેવન્યુ ડિપાર્ટમેન્ટ જો ટૅક્સ નાખશે તો તેમનો ખર્ચ હજી વધશે. બિલ્ડરો આ ખર્ચ છેવટે તો લોકો પર જ નાખશે તેથી ફ્લૅટના ભાવ ઘટશે નહીં પણ વધશે.

સરકાર વેચાયા વિનાના ફ્લૅટોને સ્ટૉક ઇન ટ્રેડ ગણીને એના પર પ્રૉપર્ટી-ટૅક્સ નાખવા વિચારે છે પણ એના પર ટૅક્સ લાગુ ન કરી શકાય; કારણ કે જે ચીજો યુઝમાં છે એના પર ટૅક્સ લગાવી શકાય, જે યુઝમાં જ નથી એના પર કેવી રીતે ટૅક્સ લગાવાય? હકીકતમાં રેવન્યુ મેળવવા માટે સરકાર આ બધા નુસખા કરી રહી છે. માલ સસ્તો કરવા માટે તમે વેપારીને મારો એ ખોટું છે. ફ્લૅટનું કૉસ્ટિંગ અમને સસ્તામાં પડતું થશે ત્યારે જ અમે ફ્લૅટ સસ્તો વેચી શકીશું. ટૅક્સ કેવી ખોટી રીતે લેવાય છે એ જુઓ. એક બિલ્ડિંગ ૪૦ વર્ષ જૂનું હોય તો એના પર ૪૦ વરસ પહેલાંનો ટૅક્સ લેવાય, પણ રીડેવલપમેન્ટ માટે એને પાડી દેવાય ત્યારે ઓપન જમીનનો ટૅક્સ લેવાય અને બને પછી રેસિડન્સનો ટૅક્સ લેવાય. રેવન્યુ વધારવા માટે સરકાર રોજ આવાં નવાં ગતકડાં કરે છે. સરકારે પોતે લોકોને સસ્તું મળે એ માટે કંઈ છોડવું નથી અને બિલ્ડરોનાં ખિસ્સાં કાપવાં છે. જો સરકારી સિસ્ટમ સુધરે તો છેલ્લાં ચાર વર્ષમાં ૨૫ ટકાથી પણ ઓછી ફાઇલો પાસ થઈ છે એવું ન થયું હોત. આમાં બિલ્ડરો પર વ્યાજનો બોજો વધતો જાય છે અને એ કૉસ્ટ છેવટે બાયર પર પડે છે. સરકાર લોકોને એમ કહેતી હોય કે આ રીતે લોકોને ફાયદો થવાનો છે, પણ વાસ્તવમાં એની રેવન્યુ વધવાની છે અને લોકોને નુકસાન.

સરકારી સિસ્ટમ સુધરે તો જ ભાવ નીચે આવે : લલિત મંગે, અમી ગ્રુપ



બિલ્ડરો પર ટૅક્સનું પ્રેશર નાખશે તો તેઓ ફ્લૅટ વેચવા નીકળશે અને ભાવ ઓછા કરશે એવું નહીં બને. બિલ્ડરો પાસે વેચાયા વિનાના ફ્લૅટ છે એના ઊંચા ભાવનું કારણ છે સરકારના જાત-જાતના ટૅક્સ. સરકારે પ્રીમિયમ એટલું વધાર્યું છે કે બિલ્ડરોનો ખર્ચ વધી જાય છે જે છેવટે ફ્લૅટના રેટ પર પડે છે. સરકાર પ્રીમિયમના ચાર્જ ઓછા કરે તો બિલ્ડરોનો ખર્ચ ઓછો થાય અને ફ્લૅટનો રેટ પણ ઘટે. ઓપન સ્પેસની ડેફિશ્યન્સી પર સરકાર ૧૦૦ ટકા ચાર્જ લે છે. આ બધો ભાર છેવટે લોકો પર જ પડે છે. બિલ્ડર તો બાયર પાસેથી જ આ કિંમત વસૂલશે. ટૅક્સ નાખીને સરકાર પરોક્ષ રીતે પ્રેશર પ્રજા પર વધારે છે. જે બિલ્ડરની કૅપેસિટી હશે તે પોતાના ફ્લૅટ પકડી રાખશે, પોતાના ખર્ચથી ઓછા ભાવે તો નહીં જ વેચે. ફ્લૅટ સસ્તા કરવા એનું કૉસ્ટિંગ કેવી રીતે નીચું આવી શકે એ જોઈએ. વૅટ, સર્વિસ-ટૅક્સ, રજિસ્ટ્રેશન-ટૅક્સ વગેરે અનેક જાતના જ ટૅક્સ નાખવામાં આવે છે. એ ન હોય તો બિલ્ડરને નીચું કૉસ્ટિંગ થાય. બીજું, બિલ્ડિંગ બનાવવા માટે એક ફાઇલ ક્લિયર કરવા માટે જે સમય લાગે છે એ સમયમાં બિલ્ડર પર તો લોનનો બોજ વધતો જાય છે. બાવનથી વધારે જુદા-જુદા ટૅક્સ અને ફ્બ્ઘ્ ક્લિયર કરવાં પડે છે. સરકાર તરફનું આ ક્લિયરન્સ કેમ જલદી નથી આપવામાં આવતું. જો એ જલદી મળે તો બિલ્ડરનો ખર્ચ ઘટે. ઉપરાંત ફાઇલોનું ક્લિયરન્સ ઈઝી હોવું જોઈએ અથવા તો સિંગલ વિન્ડો ક્લિયરન્સ હોવું જોઈએ. પ્રીમિયમના રેટ ઓછા હોવા જોઈએ. સરાકરનાં પૉલિસી રિલેટેડ ડિસિઝન બહુ મોડાં આવે છે. રૉ-મટીરિયલના ભાવ આસમાને હોય છે. બિલ્ડિંગ બનાવવા માટેની રેતી ચોક્કસ સમયે જ મળે એવું શું કામ? જો એ પછીથી લેવી હોય તો ડબલ ભાવ આપવા પડે. આ બધા જ ખર્ચા છેવટે ફ્લૅટ ખરીદનારા પર જ આવે છે. એથી જો સરકાર ફ્લૅટના ભાવ ખરેખર ઘટાડવા ઇચ્છતી હોય તો સિસ્ટમ સહિતની આ બધી બાબતો પર ધ્યાન આપે.

સિડકો અને મ્હાડા કેમ ભાવ વધારે છે? : પ્રવીણ દોશી, એક્મે ગ્રુપ


સરકારે ટૅક્સ નાખવો જ છે તો ડેવલપ થવા માટેની જમીનના જે ખાલી પ્લૉટ છે એના પર નાખે જેથી આ જમીનો જલદી ડેવલપ થાય અને માર્કેટમાં બિલ્ડિંગોની ભરમાર થાય તો ભાવ નીચે આવે. સરકારે ફ્લૅટના ભાવ ન વધે એ જોવું હોય તો રૉ-મટીરિયલ તેમને મોઘું ન પડે એ જોવું જોઈએ. બિલ્ડરોના જ ભાવ વધુ છે એવું નથી, સિડકો અને મ્હાડાના ભાવ પણ વધુ છે. તો એ કેમ સસ્તા ફ્લૅટ નથી આપી શકતાં? કારણ કે તેમને પણ ફ્લૅટ બનાવવાનો ખર્ચ વધુ જ આવે છે. શાકભાજી મોંઘાં હોય ત્યાં ડબ્બો બનાવવાવાળો સસ્તું ટિફિન આપી શકશે?

આમાં સરકારને દુખે છે પેટ અને કૂટે છે માથું જેવો ઘાટ છે. પબ્લિકને સારું લગાડવાની આ મસ્તી છે. ઊલટાનું જો ટૅક્સ નખાશે તો બિલ્ડરો એને બચાવવવાની કોશિશ કરશે. ર્કોટમાં કેસ ચાલશે અને એ એટલો લંબાશે કે ત્યાં સુધીમાં ઇલેક્શન પતી જશે. ફ્લૅટની કૉસ્ટ ઘટાડવી છે તો નીચેથી ચાલુ કરો. ડાયરેક્ટ બનેલા ફ્લૅટ પર ટૅક્સ નાખવાથી શું? બિલ્ડિંગ માટેના રૉ-મટીરિયલ પર ટૅક્સ નાખતાં સરકાર ડરે છે, કારણ કે એ લૉબી બહુ પાવરફુલ છે. બીજું, સરકાર આગળ પ્લાન પાસ કરાવવા માટે ૫૬ ક્લિયરન્સ જોઈએ અને એ મેળવતાં અઢીથી ત્રણ વર્ષ નીકળી જાય છે. હવે આટલાં વરસ કામ ન થાય અને બિલ્ડર પર વ્યાજનો બોજ તો વધતો જ જાય એ કોણે સહન કરવાનો આવે? એ જલદી પ્લાન પાસ કરે એવી સિસ્ટમ બનાવે તો ફ્લૅટની કૉસ્ટમાં વધારો બિલ્ડરે ન વેઠવો પડે. સરકારે પ્લાન પાસ કરવા ચોક્કસ ડેટ રાખીને એના પર રિસ્ટ્રિક્શન મૂકવું જોઈએ. આજે ફાઇલ-ક્લિયરન્સમાં ૪૦૦ વેઇટિંગ છે. ઉપરાંત કેટલાંક પૉલિસી-ડિસિઝન પણ ફાસ્ટ નથી થતાં એથી કામ અટકી પડે છે જેને કારણે ફ્લૅટની કિંમત વધતી જાય છે. એથી ફ્લૅટના રેટ ઘટાડવા સરકારે સિસ્ટમ સુધારવાની જરૂર છે.










Comments (0)Add Comment

Write comment
quote
bold
italicize
underline
strike
url
image
quote
quote
smile
wink
laugh
grin
angry
sad
shocked
cool
tongue
kiss
cry
smaller | bigger

security code
Write the displayed characters


busy
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK