ઓછું ખાવાથી પાતળા થવાય?

કાયમી પાતળા રહેવું હોય તો ઓછું ખાવાથી આ પ્રૉબ્લેમનું સૉલ્યુશન મળતું નથી. ઊલટું ઓછું ખાવાને કારણે શરીર ફૂલી જાય, વધુ મેદ જમા થાય અને વિચિત્ર પ્રકારે જાડા થવાય છે. આ રીતે વધેલું વજન ફરી ઉતારવું પણ અઘરું પડે છે

deepiuka

જિગીષા જૈન

હું તો ફક્ત બે જ રોટલી ખાઉં છું છતાં આટલી જાડી છું.

હું તો કોઈ વાર બપોરે જમું તો કોઈ વાર કંઈ નહીં ખાઉં. સાથે કેટકેટલાં વ્રત પણ કરું છું જેમાં આખો-આખો દિવસ ભૂખી રહું છું. પણ વજન તો ઊતરતું જ નથી.

ભૂખ્યા રહી-રહીને મહામહેનતે ૩ મહિનામાં ૫-૬ કિલ્લો વજન ઉતાર્યું, પરંતુ લગ્નમાં ગયા અને ત્યાં ૨-૩ દિવસ બધું ખાધું તો ૪ દિવસમાં દોઢ કિલો વધી ગયું. હવે ડર લાગે છે કે શું હું કોઈ દિવસ ખાઈ નહીં શકું? કંઈ પણ ખાઉં તો તરત જ વજન વધે છે. જાણે કે પચતું જ ન હોય. 

હું વીસ વર્ષનો હતો ત્યારે ૮ રોટલી ખાઈ જતો તો પણ ખબર નહોતી પડતી. ત્યારે સાવ સોટી જેવો પાતળો હતો. આ ૩૫ વર્ષની ઉંમરે ૩ રોટલીમાં પણ ફાંદ બહાર આવી ગઈ છે.

પહેલાં તો થાળી ભરીને ભાત ખાઈ જતો. એ સમયે બધું પચી જતું. વજન પણ એકદમ માપસર હતું. છેલ્લા પાંચ મહિનાથી વજન વધી ગયું એટલે ભાત છોડ્યા છે. ભાત ખાવા તો દૂર, સૂંઘતો પણ નથી. પરંતુ ખાવાનો કોઈ સંતોષ થતો નથી. ચાલે, જો એમ પણ વજન ઊતરતું હોય તો નહીં ખાઈએ ભાત.

પ્રકારના કિસ્સા તમારી સાથે કે તમારી આજુબાજુ બનતા તમે જોયા કે અનુભવ્યા હશે. તમારી આજુબાજુ રહેલા મેદસ્વી લોકોનો એક વાર ખોરાક તપાસજો. એ જોશો તો ખબર પડશે કે આ લોકો ઍવરેજ કરતાં પણ ઓછું જમતા હોય છે. ઘરમાં જ થોડું ધ્યાન આપશો તો ખબર પડશે કે કોઈ પણ વ્યક્તિ વધુ ખાવાને લીધે જાડી નથી થઈ હોતી, પરંતુ ખોટું ખાવાને લીધે જાડી થતી હોય છે. આ સિવાય પણ જાડા થવાનાં ઘણાં કારણો છે. છતાં વજન ઓછું કરવાની વાત આવે તો લોકો પોતાનો ખોરાક ઘટાડી દેતા હોય છે. જે ખોરાક નાનપણથી ખાતા આવ્યા હોય અને જે ખાઈને તેમનો આત્મા તૃપ્ત થતો હોય એ ખોરાક પણ વેઇટલૉસના ચક્કરમાં છોડી દેતા હોય છે, જે અત્યંત હાનિકારક છે.

ઓછું જમીએ ત્યારે...


જ્યારે આપણે આપણો દૈનિક ખોરાક ઓછો કરી નાખીએ ત્યારે શું થાય છે એ સમજાવતાં ક્રિટિકૅર હૉસ્પિટલ, જુહુ અને ધ્ન્લ્ મેમોરિયલ હૉસ્પિટલ, વિલે પાર્લેનાં ડાયટિશ્યન યોગિતા ગોરડિયા કહે છે, ‘જ્યારે આપણે ખોરાક ઘટાડીએ ત્યારે શરીરને સંકેત મળે છે કે એનર્જી‍ માટે ખોરાક ઘટવાનો છે એટલે એ સંગ્રહ કરવાનું ચાલુ કરે છે. એટલે કે શરીરની પ્રકૃતિ સંગ્રહ કરવાની બની જાય છે. જ્યારે ઓછો ખોરાક હોય ત્યારે તો વાંધો નથી આવતો, વજન ઓછું થઈ જ જાય છે. પરંતુ ક્યાં સુધી તમે ઓછા ખોરાક પર જ જીવશો? ક્યારેક તો ખાશો જ. જ્યારે થોડું પણ વધુ ખાધું ત્યારે શરીરનો એ સંગ્રહનો સ્વભાવ જાગૃત થયેલો છે એ તમને નડશે. જે થોડું પણ તમે ખાઓ છો એનો ઉપયોગ કરવાને બદલે શરીર એનો સંગ્રહ કરશે. એટલે જ ઓછું ખાઈને જે લોકો વજન ઉતારે છે તે જેવું ખાવાનું શરૂ કરે કે તેમનું વજન તરત જ વધી જાય છે. એ પણ અદોદળું લાગે એ રીતે વધતું જાય છે. આ રીતે ભૂખ્યા રહીને વજન ઓછું કરવું બિલકુલ યોગ્ય નથી.’

મસલ લૉસ થાય ફૅટ લૉસ થવાને બદલે


જ્યારે આપણે જમવાનું ઓછું કરી નાખીએ છીએ ત્યારે જે વજન ઘટેલું આપણને દેખાય છે એ હેલ્ધી વેઇટલૉસ નથી એમ સમજાવતાં ફિમ્સ ક્લિનિક, માટુંગા અને વિલે પાર્લેનાં નેચરોપૅથિક ન્યુટ્રિશનિસ્ટ ધ્વનિ શાહ કહે છે, ‘આ રીતે જ્યારે લોકો વજન ઉતારે છે ત્યારે તેમના સ્નાયુઓ તૂટે છે, જેને મસલ લૉસ કહેવાય છે. મસલ્સની આપણને ખૂબ જરૂર હોય છે. એ તૂટવા ન જોઈએ. જ્યારે આપણે વજન ઉતારવાનું વિચારીએ છીએ ત્યારે આપણું ફોકસ હંમેશાં જે ફૅટ જમા થઈ છે એને બાળવાનું હોવું જોઈએ. શરીરમાંથી ફૅટનું પ્રમાણ જરૂર કરતાં વધારે હોય એ નુકસાનકારક છે અને આ ફૅટને બાળવાની પ્રક્રિયા જ વેઇટલૉસ છે, જે યોગ્ય રીતે કરો તો જ થાય નહીંતર ફૅટ એમનેમ રહે અને મસલ લૉસ થઈ જાય, જે વધુ અનહેલ્ધી ગણાય. આમ ભૂખ્યા રહેવું વેઇટલૉસ માટે ખરાબ છે.’

પોષણનો અભાવ


ખોરાકનું મુખ્ય કામ આપણને પોષણ આપવાનું છે. જ્યારે તમે વિચાર્યા વગર ખોરાક બંધ કરી દો છો કે ઓછો કરી દો છો ત્યારે પહેલી અસર પોષણ પર પડે છે. વિટામિન્સ, મિનરલ્સ અને પ્રોટીનની કમી થાય તો શરીરને વધુ નુકસાન ભોગવવું પડે છે એ અહીં સમજવું જરૂરી છે. ઘણા લોકો કૅલરી પ્રત્યે સજાગ રહે છે. ઘણી વાર સાંજે પાણીપૂરી કે ચાટ ખાઈ લે છે અને પછી કંઈ ખાતા નથી. કહે છે કે પેટ તો ભરાઈ ગયું. પરંતુ પોષણનું શું? આ પ્રશ્ન દ્વારા સમજાવતાં યોગિતા ગોરડિયા કહે છે, ‘વેઇટલૉસ ત્યારે જ થાય જ્યારે શરીર એકદમ બૅલૅન્સમાં હોય. એનું બૅલૅન્સ હટે તો વેઇટલૉસ થતું નથી. પોષણની ઊણપ આવે તો હૉર્મોનલ ઇમ્બૅલૅન્સ થાય, સ્ટ્રેસ વધે અને રોગપ્રતિકારક શક્તિ ઘટે. આમ નુકસાન વધુ થાય. જે લોકો વેઇટલૉસ માટે ડાયટિશ્યન પાસે આવે છે તે હંમેશાં એક ફરિયાદ કરે છે કે આટલું બધું ખાવાનું? કોઈ દિવસ યોગ્ય ડાયતટશ્યન ખોરાક ઓછો કરતા નથી, પરંતુ સારા ખોરાકની માત્રાને વધારે છે. ખોરાકમાંથી પૂરતું પોષણ મળી રહે એ જ સાચું ડાયટ અને એનાથી જ વજન પ્રમાણમાં રહે છે.’

શું ન છોડવું?


તેલ-ઘી : ઘણા લોકો વેઇટલૉસ કરવા માટે ઘી-તેલ સાવ છોડીને બેસી જાય છે. ઘીને અડતા પણ નથી અને તેલને ફક્ત નજીવું વાપરે છે. આવી વ્યક્તિઓની ૩-૪ મહિનામાં સ્કિન ખરાબ થતી જોવા મળે છે, વાળ પાંખા થઈ જાય છે, હાડકાંની તકલીફ ચાલુ થઈ જાય છે. ગુડ ફૅટ્સ શરીર માટે ઘણી જરૂરી છે, જેમાં ઘી અને તેલનું નિશ્ચિત પ્રમાણ, ડ્રાયફ્રૂટ્સ, નારિયેળ વગેરે આવી જાય છે. એને સાવ છોડી દેવાં મૂર્ખામી છે.

ઘઉં  :
ઘણા લોકો ખોરાક ઓછો કરવાના ચક્કરમાં ઘઉં ખાવાના છોડી દે છે. ડાયટિશ્યન પાસે જાઓ ત્યારે તે તમારી ડાયટમાં જુવાર, બાજરી, નાચણી જેવાં ધાન્યો શરૂ કરે છે અને કહે છે કે ઘઉં હમણાં ન ખાતા. એનું કારણ એ નથી કે ઘઉં ખરાબ છે, પરંતુ એ છે કે બીજાં ધાન્યો પણ ઘઉં જેટલાં જ પોષણયુક્ત છે. એટલે ઘઉં ખરાબ છે એમ ન વિચારો, પરંતુ બધાં ધાન્યો ખાઓ એવો આશય હોય છે. 

ચોખા : ઘણા લોકો ચોખાને પણ વિલન માને છે. જેવું વજન ઓછું કરવાનું થાય કે ચોખા ખાવાનું છોડી દે છે. ચોખા ભારતમાં ઊગતું અત્યંત ઉપયોગી ધાન્ય છે. એ વિલન નથી, પરંતુ હીરો છે. આપણા શરીરને એ ભરપૂર પોષણ આપે છે અને એટલે જ એ ખાવાથી અંતરાત્માને તૃપ્તિ મળે છે. આ એક દુ:ખદ વાત છે કે ભારતમાં ઊગતી વસ્તુઓનું મૂલ્ય અને એની ઉપયોગિતા આપણે પશ્ચિમી રિસર્ચ પર આધારિત રહીને કરીએ છીએ અને પછી કહીએ છીએ કે ઓટ્સ હેલ્ધી છે અને ચોખા નહીં. કોઈ પણ ખોરાક જે જમીનમાંથી ઊગે છે એ હેલ્ધી જ છે. એને કઈ રીતે ખાવો એ શીખવું જરૂરી છે.

જો છોડવું જ હોય તો શું છોડાય?

જો ખાવાનું ઓછું કરવું જ હોય તો બહાર ખાવાનું ઓછું કરવું. પ્રોસેસ્ડ ફૂડ, પૅકેટ ફૂડ, જન્ક ફૂડ, ફાસ્ટ ફૂડ ઓછું કરવું. બિસ્કિટ, બ્રેડથી માંડીને પાંઉ સુધી મળતી બેકરી પ્રોડક્ટ ન ખાવી. ઠંડાં પીણાં, શુગરી ડ્રિન્ક્સ, કૅફીન તkવો, કોલ્ડ ડ્રિન્ક્સ બધું બંધ કરવું. ઘરમાં બનતાં રોટલી-દાળ-ભાત-શાક ઓછાં ખાઈને વેઇટલૉસ કરવાની ભૂલ ન કરવી.

Comments (0)Add Comment

Write comment
quote
bold
italicize
underline
strike
url
image
quote
quote
smile
wink
laugh
grin
angry
sad
shocked
cool
tongue
kiss
cry
smaller | bigger

security code
Write the displayed characters


busy
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK