સફેદ ડાઘ હોવા છતાં આ યુવતી મૉડલિંગની ગ્લૅમરસ દુનિયામાં આત્મવિશ્વાસ સાથે કૂદી પડી છે

બાળપણમાં વિટિલિગો રોગને કારણે સામાજિક રીતે ખૂબ હડધૂત થયા છતાં હાર ન માનનારી મૂળ કૅનેડાની અને હાલમાં અમેરિકાના કૅલિફૉર્નિયામાં રહેતી ચૅન્ટેલ બ્રાઉન-યંગ નામની ૧૯ વર્ષની યુવતીએ પોતાના ડર અને સંકોચને જે હિંમતથી ખંખેરી નાખ્યા છે એ કાબિલેદાદ છે






ગ્લૅમર-વર્લ્ડમાં ટકી રહેવા માટે જાતજાતની કૉસ્મેટિક સર્જરીઓ કરાવીને સુંદર દેખાવા મથતી મૉડલ્સની આ ધરતી પર કોઈ કમી નથી. અત્યંત સુંદર હોવા છતાંય ઘણી યુવતીઓને પોતાની અમુક-તમુક ચીજો ગમતી નથી. કાશ મને ગોરી ત્વચા મળી હોત... કાશ મારું નાક ચીબું હોવાને બદલે અણીદાર હોત...

કોઈ યુવતીની આ કાશની યાદી કદી ખતમ થતી નથી. જોકે કૅલિફૉર્નિયામાં રહેતી ૧૯ વર્ષની ચૅન્ટેલ બ્રાઉન-યંગ નામની મૉડલની વાત જ કંઈક ન્યારી છે. તેના આખા શરીરે સફેદ કોઢ છે ને છતાં આ યુવતી કોઈ જ છોછ વિના, કશું જ છુપાડ્યા વિના, નખશીખ આત્મવિશ્વાસ સાથે મૉડલિંગ કરે છે. કહેવાય છે કે વિશ્વમાં આવી કદાચ પહેલી અને એકમાત્ર મૉડલ છે.

પહેલાંના જમાનામાં વિટિલિગો એટલે કે સફેદ કોઢને પરમાત્માનો પ્રકોપ સમજવામાં આવતો. મૉડર્ન યુગ એવું નથી માનતો. છતાં સફેદ કોઢ વિશેનો સૉશ્યલ સ્ટિગ્મા એટલે કે સામાજિક અછૂતપણું હજીયે દૂર નથી થયું. વિશ્વની કુલ વસ્તીમાંથી લગભગ પોણો ટકા વસ્તીને વિટિલિગો નામની ત્વચાની બીમારી થાય છે. મોટા ભાગના લોકોને એનાં ખૂબ નાનાં સ્પૉટ્સ હોય છે જે તેઓ કપડાંની અંદર છુપાવી રાખવા માટે ડ્રેસિંગ સ્ટાઇલ પર્મનન્ટ ચેન્જ કરી નાખે છે. જોકે ૧૯ વર્ષની ચૅન્ટેલ આ બધાથી માત નથી થઈ. હાથ, પગ, ચહેરા, પીઠ બધે જ બહુ વિચિત્ર રીતે ફેલાયેલા સફેદ ડાઘ સાથે ટૂ-પીસ બિકિનીમાં પણ તેણે ફોટો પડાવ્યા છે. ફેસબુક પર આ ફોટો વહેતા મૂક્યા પછી તેને જાતજાતનાં મૅગેઝિનનો માટે ફોટો-શૂટ કરવાનું કામ મળ્યું છે. હાલમાં તેણે અમેરિકાના ફેમસ ટીવી-શો ‘અમેરિકાઝ નેક્સ્ટ ટૉપ મૉડલ’માં ભાગ લીધો છે અને એમાં તેણે ફાઇનલિસ્ટોમાં સ્થાન મેળવી લીધું છે.

એવું નથી કે ચૅન્ટેલ માટે અહીં સુધી પહોંચવું બહુ આસાન હતું. સમાજની ત્રાંસી નજરો, તિરસ્કાર બધું જ તેણે બાળપણમાં ખૂબ જ સહન કર્યું છે. બાળપણમાં કૅનૅડાના ટૉરોન્ટો શહેરમાં રહેતી હતી ત્યારે સ્કૂલમાં તેની સાથે ભયંકર આભડછેટ રખાઈ. કોઈ તેને ઝીબ્રા કહેતું તો કોઈ તેને ડાકણ. કોઈ તેની સાથે બેન્ચ પર બેસવા તૈયાર નહોતું. કોઈ બાળક તેની સાથે પોતાનો નાસ્તો શૅર ન કરતું. એટલે સુધી કે તેને સ્કૂલ-બસવાળાએ પણ લાવવા-લઈ જવાની ના પાડી દીધેલી. રોજ રાતે એકલી-એકલી ઓશીકું પલળી જાય એટલું રડીને તે દિલ હળવું કરી લેતી. હદ તો ત્યારે આવી જ્યારે સ્કૂલના છેલ્લા દિવસે કેટલીક તોફાની અને ઘમંડી છોકરીઓની ટોળકીએ તેને આંતરીને ખૂબ રૅગિંગ કર્યું. એ દિવસે રાતે તેણે સુસાઇડ કરી લેવાનું વિચારેલું. બાળમન પર થતા આટલા કારમા આઘાતોની વચ્ચે તેને એકમાત્ર મમ્મી લિસા બ્રાઉનનો જ સધિયારો હતો. જ્યારે લિસાને સ્કૂલમાં બનેલી ઘટના વિશે ખબર પડી ત્યારે તેને થયું કે હવે ચૅન્ટેલને આ દોજખમાંથી દૂર કરવી હોય તો વાતાવરણ ચેન્જ કરવું પડશે.

ટીનેજમાં પ્રવેશી ચૂકેલી ચૅન્ટેલને લઈને લિસા કૅનૅડાથી કૅલિફૉર્નિયા રહેવા આવી ગઈ. નવા વાતાવરણમાં ચૅન્ટેલે પોતાના રોગને સમજ્યો. એ વિશેની બધી જ માહિતી જાણ્યા પછી તે ધીમે-ધીમે પોતાની આ અવસ્થાનો સ્વીકાર કરતી થઈ.

વિટિલિગો એ શરીરની રોગપ્રતિકારક સિસ્ટમમાં થતી ગરબડને કારણે પેદા થતો રોગ છે. એેનો કોઈ ઇલાજ નથી, માત્ર એને શરીરની ત્વચા પર ફેલાવાની પ્રક્રિયાને ધીમી પાડી શકાય છે. આ એ જ રોગ છે જે પૉપસ્ટાર માઇકલ જૅક્સનને પણ થયેલો. આટલું સમજ્યા પછી તેણે કૉન્શ્યસલી નક્કી કર્યું કે તેણે પોતાની આ બીમારીનો જરાય છોછ નથી રાખવાનો. એ માટે સૌથી પહેલાં તો તેણે પોતાના વાઇટ સ્પૉટ્સ છુપાવે એવી સ્ટાઇલિંગ ચેન્જ કરી. એટલું જ નહીં, તેણે ફેસબુક પર બેધડક થઈને પોતાના મૉડલિંગ કરતા ફોટો ફેલાવી દીધા. ત્યાંથી તેની લાઇફે વળાંક લીધો. ચૅન્ટેલ કહે છે, ‘મેં એક વાર નક્કી કર્યું કે હું જે છું, જેવી છું એવું જ સૌંદર્ય આત્મવિશ્વાસ સાથે છતું કરીશ એ પછી મનમાંથી ઘણોબધો સંકોચ ખરી પડ્યો. લોકો શું કહેશે એનો વિચાર અનેક વાર આવ્યો, પણ મેં એની પરવા નહીં કરવાનું સભાનપણે નક્કી કર્યું. હું સુંદર નહીં લાગતી હોઉં તો? લોકો મારા વાઇટ સ્પૉટ્સ જોઈને કેવું રીઍક્ટ કરશે? મને તિરસ્કૃત કરશે તો? આવા તમામ ડરે હું કેટલીયે રાતો સૂતી નથી.’

હાલમાં તે આ સમસ્યા સાથે ઝૂઝતી વિશ્વની સૌથી પહેલી અને એકમાત્ર મૉડલ છે. તેનું મિશન છે કે સફેદ ડાઘની આ સમસ્યા બાબતે જાગૃતિ આવે અને સમાજ આ રોગને વધુ મૅચ્યોર અભિગમ સાથે હૅન્ડલ કરે.

Comments (0)Add Comment

Write comment
quote
bold
italicize
underline
strike
url
image
quote
quote
smile
wink
laugh
grin
angry
sad
shocked
cool
tongue
kiss
cry
smaller | bigger

security code
Write the displayed characters


busy
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK