દીકરાના ફ્રેન્ડ બનતા પપ્પા દીકરા પાસેથી બાપ છીનવી લે છે

જનરેશન-ગૅપના નામની કાગારોળ મચાવનારા લોકોને કહેવાનું કે જનરેશન-ગૅપ જરૂર છે. આ જે ગૅપ છે એ અનુભવ અને કલ્પના વચ્ચેનો સેતુ છે અને આ સેતુ જ જીવન જીવવાની વાસ્તવિકતા શીખવવાનું કામ કરે છે

anil kapoor

સોશ્યલ સાયન્સ - રશ્મિન શાહ

હું અને મારો દીકરો તો સાથે દારૂ પીએ છીએ. સિગારેટના કશ તો અમે એક સિગારેટમાંથી મારી લઈએ. પપ્પાની હાજરીમાં મને ગાળ બોલવામાં કોઈ સંકોચ ન થાય.

આવી વાતો જ્યારે પણ અને જ્યાં પણ થતી હોય ત્યાં દેખાડવાનો પ્રયાસ એ જ થતો હોય છે કે અમારી વચ્ચે જનરેશન-ગૅપ નથી અને જેને જનરેશન-ગૅપ દેખાડવામાં સંકોચ થાય છે એ બાપ પોતાના દીકરાનો ફ્રેન્ડ તો બની જાય છે પણ એવું કરીને તે પોતાના દીકરા પાસેથી બાપ છીનવી લેતો હોય છે. બાપ ભારાડી જ હોવો જોઈએ, તે ક્યારેય રડતો ન હોય એવું જ દૃશ્ય આંખ સામે આવવું જોઈએ. તે રડે નહીં, રડાવે એવો હોય અને મારો બાપ મને આજે પણ, આ સમયે પણ રડાવવાને સમર્થ છે. એ જ તો તેનું કામ છે. તેનો કડપ અને તેની કડકાઈ ભરાવદાર હોવાં જોઈએ. રાતે ઘરમાં મોડા દાખલ થતી વખતે બ્લડ-પ્રેશર ગ્રાઉન્ડ ફ્લોરથી જ વધી ગયું હોય તો એમાં કશું ખોટું નથી. ડરના ઝરૂરી હૈ સાબ. જો ડર નહીં હોય તો લક્ષ્મણરેખાનું અવમૂલ્યાંકન ક્ષણભરમાં થઈ જશે અને ઘર ઘરને બદલે ધર્મશાળા બની જશે કે પછી બાપ બુદ્ધિનો લઠ હશે તો બૅચલર્સ હોમ જેવું વાતાવરણ સર્જાઈ જશે. જોકે એવું ન બનાવવું હોય, ઘરને ઘર જ રહેવા દેવું હોય અને ઘરની પોતાની જે નિયમાવલિ છે એને અકબંધ રાખવી હોય તો પિતાએ પિતાનું રૂપ અને એ સ્વરૂપ અકબંધ રાખવું પડશે.

જનરેશન-ગૅપ ખરેખર જરૂરી છે અને એ હોવો પણ જોઈએ. આજે તમે જે કંઈ છો, આજના પપ્પાઓ તેમના આજના જે કોઈ સ્તર પર છે એ સ્તર આ જનરેશન-ગૅપને આધારિત છે.

જનરેશન-ગૅપની જ આ દેન છે કે આજે તમને ઘરના એકેએક નિયમ, ઘરની એકેએક નીતિરીતિ અને તમારી છતની નીચે રહેતી દરેક વ્યક્તિની પરવા છે. આ પરવાને લીધે જ આખો પરિવાર આજે એક છે અને જો એ પરિવારને અકબંધ રાખવો હોય તો જનરેશન-ગૅપને ક્યાંય દૂર કરવા જવાની જરૂર નથી. ભલે કહે સો-કૉલ્ડ સમાજશાસ્ત્રીઓ કે એક ચોક્કસ એજ પછી માબાપે સંતાનોના ફ્રેન્ડ બની જવું જોઈએ. ના રે, કોઈ એવી આવશ્યકતા નથી. દીકરો ફ્રેન્ડ બહાર બનાવી શકશે, પણ બાપ ઘરની બહાર નહીં શોધી શકે; દીકરી ફ્રેન્ડ તો કોઈને પણ બનાવી શકશે, પણ મા માટે તો તેણે ઘરમાં જ નજર કરવી પડશે અને તે તેને ઘરમાંથી જ મળવી જોઈએ. સત્તર વર્ષની ઉંમરે મોબાઇલમાંના મેસેજમાંથી જો દીકરીની લવસ્ટોરી પકડાય અને મા આખું ઘર માથે લઈ લે તો એ વાજબી છે, એ જ કામ તેણે કરવાનું હોય અને આવું તે કરવાની હોય તો જ દીકરી પણ તેના સંસ્કારોની મર્યાદાને ધ્યાનમાં રાખીને રહેશે. જો વીસ વર્ષની ઉંમરે દીકરાના ખિસ્સામાંથી માચીસ મળે અને બાપ ઘર આખું ધુણાવે તો જરાય ખોટું નથી. આ જ કામ કરવાની જવાબદારી તેના શિરે છે અને તેણે આ જ કામ કરવાનું છે. દીકરાના ખિસ્સામાંથી માચીસ કે કૉન્ડોમ મળે ત્યારે પોરસાનારો બાપ હકીકતમાં પોતાની વિકૃતિને પ્રોત્સાહન આપવાનું કામ કરતો હોય છે. દીકરીના બૉયફ્રેન્ડના ફ્રેન્ડ બનીને ઊભા રહી જનારા પપ્પા માટે પણ આ જ કહી શકાય. કહેવાનો ભાવાર્થ એવો બિલકુલ નથી કે ભૂલ કરીને ઘરે પાછી આવેલી દીકરીને સાથ ન આપવો. આપવો જ જોઈએ તેને હાથ, પણ તે જે સમયે ભૂલ કરતી હોય એવું લાગતું હતું ત્યારે પ્રોત્સાહન આપવાની ભૂલ તો ન જ થવી જોઈએ. સત્તાવીસની ઉંમરે પહોંચેલો દીકરો પોતાની ગમતી છોકરી સાથે ન પરણી શકે અને તે વિદ્રોહ પણ ન કરી શકે તો એમાં માત્ર જનરેશન-ગૅપને આંખે ચડાવવાને બદલે માબાપની દૂરંદેશીને પણ મહkવ આપવું પડે. દરેક તબક્કે વાતને નકારાત્મક મોડ આપીને ઊભા રહી જતા બાપની વાતમાં રહેલી નકારાત્મકતા જોવાને બદલે એમાં રહેલી સાવચેતી અને સાવધાનીના સૂરને પણ ઓળખતાં શીખવું પડે અને જો એ શીખી શકાય તો જનરેશન-ગૅપ વાજબી છે એ સમજી શકાય.

યાદ રાખજો, એક નહીં પણ એક હજાર વખત સ્વીકારજો કે જનરેશન-ગૅપ હોવો જોઈએ. સાત વર્ષના દીકરાને ખીજવાતા પપ્પા ખોટા છે એ કહેવાનો હક માત્ર દાદાને જ હોય છે અને દાદા એ કહેતા પણ હોય છે અને દાદા જ્યારે આ કહેતા હોય છે ત્યારે તે તેમના દીકરાને અને એ જ સમયે પપ્પા પોતાના દીકરાને ખોટો માનતા હોય છે અને આ જે ખોટા માનવાની એક આખી ચેઇન છે એ ચેઇન જ જનરેશન-ગૅપ છે. જનરેશન-ગૅપ માત્ર બે પેઢી વચ્ચેનું અંતર નથી. આ જનરેશન-ગૅપ અનુભવ અને કલ્પના વચ્ચેનો સેતુ છે અને આ જે સેતુ છે એ જીવન જીવવાની વાસ્તવિકતા શીખવવાનું કામ કરે છે. જો વાસ્તવિકતા સમજવી હોય, જો એ શીખવી હોય અને જો એની સાથે સંબંધ જોડવો હોય તો આ જનરેશન-ગૅપને અકબંધ રાખવો પડશે. દીકરાની સામે સિગારેટ પીવાની હિંમત બાપમાં હોવી જ જોઈએ અને જો એ હિંમત દીકરો કરે તો તેનો ગાલ લાલ થવો જ જોઈએ. માના હાથમાં મોબાઇલ આવે ત્યારે તે વૉટ્સઍપ ચેક કરવી જ જોઈએ અને તે ચેક કરે ત્યારે એમાં કોઈ અણછાજતું જુએ તો ઘર આખું ધ્રૂજવું જ જોઈએ. આ જે ઘર ધ્રૂજે છે એ ધ્રુજારી આગામી દિવસોમાં આવનારા ભૂકંપની સામે રક્ષણ આપનારી હોય છે. નક્કી તમે કરો, પહેલાં ઘર ધ્રુજાવી લેવું છે કે પછી ભૂકંપ સમયે કાટમાળ નીચે દબાઈને જીવ છોડવો છે.

Comments (0)Add Comment

Write comment
quote
bold
italicize
underline
strike
url
image
quote
quote
smile
wink
laugh
grin
angry
sad
shocked
cool
tongue
kiss
cry
smaller | bigger

security code
Write the displayed characters


busy
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK